Mennyt pyhänpiän Vieljärven kyläs piettih Koivuine-pruazniekku. Tavan mugah rahvas kerävyi kylän stadionale. Kaikile mieldy myö oli hyvä siä, ku suovattan päivän vihmui. Pruazniekan hantuzis piettih Vagavien ristikanzoin ebävagavat kižat -kilbu, kuduah yhtyttih Vieljärven da lähi kylien rahvas.
Kilbaili kymmene joukkuo: Kolatsellän da Kinelahten joukot, Kylien nevvostoloin piälikkölöin, Vieljärven tulipalokunnan da ambulatourien joukot, Vieljärven kylänevvoston, Vieljärven souhozan, Suhininoin-Kirillovien joukot, Vieljärven nuorižon da miehien joukot. Kilbuniekoile oli valmistettu eriluaduzii vaigevuksii, kudamis läbi pidi piästä: kandua korendol vetty pienis stakanazis, rakendua korgei torni elostuskubiekois, puuttuo miäčyl kol’čah, arvata sanaristikkö. Joga vaigevukses läbi kilbuniekoil pidi mennä kahtes minuutas, da sit jo siirdyö toizeh kohtah. Kaččojua da kannattajua joga joukol oli äijy: kilbuniekoin lapset, vahnembat, rodn’at, yhtesruadajat.
– Mostu Koivuine-pruazniekkua piemmö joga vuottu, ga ku talvel tänävuon ei olluh jogavuodizii “Kylän kižoi”, sentäh nygöi piätimmö yhtistiä nämmä kaksi pruazniekkua, sanou Vieljärven kultuurutaloin johtai Mihail Jolin.
Kilvan arvostelujoukkoh mielihyväl suostuttih tulla Vieljärven souhozan endine piälikkö Sergei Popov da školan johtai Jekaterina Jevsejeva. Pruazniekan sportuohjelmua valmistettih školan liikundan opastajat Andrei Kirillov da Sergei Uččijev. Ihaškoittamah rahvastu pajoloil da tansuloil tuldih Vieljärven “Karjalazen”pajattajat, priäžäläine “Meijän Pajo” da Kinelahten naizet.
Kilvan voittajakse tuli Vieljärven tulipalokunnan joukko. Miehet suadih rindumerkit da lahjat.
Фотографии с этого мероприятия можно посмотреть в нашей фотогалерее в рубрике Кюлян кижат - 2010 (Берёзка-2010)
