Jo vuvven aloh kerran kuus Vieljärven čupun eläjät suajah lugie omua kaheksasivustu Vieljärven ikkunat -lehtie. Todevuttua tämä projektu oli jugei. Vähä on himuo, ga pidäy vie kygyy da maltuo. Lehten luadijoil Konstantin Andrejeval da Nedežda Nesteroval on kygyy lehtilöin luajindas, mies ruadoi Severnii Kurjer -lehtes, naine – “Karjalan Sanomis”. Lehten luadijat tahtottih, ku “Ikkunoin” kauti rahvas saneltas omis huolis, hommis, kerrottas omahizis, kylän eläjis.
– Duumaičin, hos olis pieni, A3-formuatan lehti luadie, en ni smiettinyh, ku rubiemmo kaheksasivustu lehtie piästämäh ilmah, mustelou Nadežda Stafejeva.
Enzimäzen lehten noumeran ilmahpiäständäh löyttih sponsoru, kudai andoi 3 000 rubl’ua (sen verdah maksau lehten painandu Petroskoil). Kerättih materjualua, internetan kauti työttih toine toizele lugiettavakse da kohendettavakse. Kolme sadua “Vieljärven ikkunoin” kappalehtu lehten luadijat myödih Kylän kižät -pruazniekal.
Lehten painosmiäry nygöi on 270 kappalehtu. Sidä suau ostua Vieljärven da lähikylien laukois. Lehten hindu ei ole ylen suuri – 15 rubl’ua. Kai jengat lehten myöndäs mennäh uvven lehten painandah.
